أول مرة أكتبلكم انهاردة عن حاجة انا لسة مجربتهاش...
بس على وشك انى اجربها قريب قوى ان شاء الله...
١. كتير من اﻷطفال بيكونوا متوترين من الحضانة...اﻻجابة على الموضوع ده بكلام زى " انت حاتحب الحضانة قوى"..."مفيش حاجة تخاف منها" مش بيطمن الطفل...
قلقه جاى من انها حاجة مجهولة بالنسبة له فاﻻحسن اننا نعرفه بالتفصيل اكثر ايه اللّى حيحصل فى الحضانة...لو الحضانة ليها موقع ممكن نفرجه الصور ونحكيله زى الحدوتة بيحصل ايه هناك...ولم ملهاش نجيبله كتب او صور عن اطفال فى المدرسة ونكلمه عنهم
٢.كتير من اﻷطفال ممكن يوافقوا على المرواح للحضانة اول اسبوع و يرفضوا بعد كدة... وده شىء معتاد ﻷنه حماسة المكان الجديد بتكون راحت و يبقى توتره و قلقه انه بعيد عنك...فمتقلقيش اذا حصل حاجة زى كدة
٣. لما يرجع طفلك من المدرسة متسألهوش سؤال عام " عملت ايه انهاردة" ﻷن كتير من اﻷطفال مش بيعرفوا يعبّروا كويس...اﻷحسن تسأليه اسئلة محددة "لعبت مع مين انهاردة" "فيه اوﻻد اشقية او مش بيسمعوا الكلام؟"...الخ
٤. حاولي تكونى علاقة جيدة مع مدرسة الفصل واسأليها اذا طفلك قالك حاجة حصلت معاه زى ان حد ضربه وﻻ حاجة حصلت ضايقته عشان تعرفى منها الحقيقة
٥.يفضل لو تعودى طفلك على اللعب الجماعى قبل ما يروح المدرسة...يتعود على فكرة الدور والمشاركة...هيسهل حياته كتير فى المدرسة
٦.كتير من اﻷطفال بيخافوا انه لو مشيتى و سيبتيهم مش هيشوفوكى تانى...اتفقوا سوا على سلام خاص بينكم واوعيديه انكم هتتقابلوا تانى...كثير من الناس بتفضل انها تتسحب و تمشي والطفل مش واخد باله...بس ده هيوتره اكثر اما ميلاقيكيش فجأة...عرّفيه انك ماشية بهدوء
٧.فى اﻷيام اﻷولى بالذات حاولى انك تستعدى فى الصباح بدرى قوى عشان يكون فيه هدوء و روقان فى اﻻستعدادت الصباحية بدل التوتر و الجري ورا نفسك...بحيث يبقى مستوى التوتر عموما أقل
٨.حاولى قدر استطاعتك اﻻ تنقلى توترك الشخصى الى طفلك
٩. اسطحبي طفلك الى المدرسة قبل الدراسة (مثلا اثناء استلام الزى والكتب و ما الى ذلك) ليرى فصله و ربما يقابل معلمته ليصبح المكان مألوفا اليه الى حد ما
١٠. آخيرا تذكرى ان المدرسات شاهدن كل شىء تقريبا من قبل وثقى فى مدى احترافيتهن فى التعامل مع طفلك....فتوكلى على الله واستودعيه طفلك وان شاء الله كله هايبقى تمام باذن الله
ها "الماميهات" الخبيرات يقولولى فى التعليقات الكلام ده ينفع وﻻ ﻷ... وايه كمان نصايح تحبوا تضيفوها؟
استمتعى بأسرتك الجميلة :)
نصائح جميلة يا ريم... انا لسه ما جربتش مع اولادي وما عندي خبرة في الموضوع لكن ابني الكبير حابب يدخل الروضة وانا قررت ادخله بستان بس حيعتبروه براعم لأنه اصغر من اقرانه ومش حيضغطو عليه بالتدريس مع انه ما شاءالله ذكي جدا وحافظ الارقام وبعض الكلمات واسماءالحيوانات والألوان باللغتين الانجليزية والعربية وازا شافته المدرسة بيتجاوب معها حتعطيه دروس متل باقي الصف... اناحابة انه يجرب بيئة تانية ويكون صداقات جديدة ويصير اجتماعي وكنت مش عارفة كيف حتعامل معاه لما يبلش الدوام بس شكرا كتييير مقالتك طمنتني وعرفتني كيف اواجه اي مشكلة بتتعلق بالموضوع هاد... شكرا يا عسل
ReplyDeleteماشاء الله ربنا يحميه ويباركلك فيه يارب وتفرحى بيه وبأخوه العسول ان شاء الله دايما... والعفو ياحبيبتى انا سعيدة جدا انك استفتدى من الكلام...وربنا يعينا جميعا على الخطوة الصعبة بس مهمة قوى دي :)
Deleteانتي العسل يا ريم ويخليلك اولادك ...هية خطوة صعبة على الطرفين الأم والطفل... الله المستعان
Delete