 |
| فطورى المفضل شوفان-تمر-موز-حليب اللوز و نسكافيه اممممم |
سمعت عن حليب اللوز قبل كدة؟
ﻷ! أديكي سمعتى عنه أهوه ( هي هي هي هي)
عذرا على اﻻستظراف على الصبح...
احم!
لماذا حليب اللوز...
الفكرة أن جسم الكثير من الناس بيعانوا حاليا من حالة اسمها " lactose intolerance " يعنى عدم تحمل اللاكتوز و هو مادة موجودة فى الحليب البقرى العادى...
ايه هى اعراض عدم تحمل اللاكتوز؟
هل تشعرين بالنعاس اذا تناولت الحليب أو مشتقاته فى الصباح؟
هل تشعرين بعسر هضم أو انتفاخ ( عذرا) بعد تناول منتجات اﻷلبان؟
عدم تحمل اللاكتوز مش مرض على فكرة...دة شىء طبيعى بيحصل للجسم البشرى و بيزيد مع العمر...يعنى الناس كلها بعد سن معين بتبدأ تتعب من الحليب و مشتقاته...
وبالطبع التلوث والمواد الحافظة الخ الخ الخ بيساعد على اصابة الناس أكتر به
وعشان كدة النباتيين ( بما انها موضة اليومين دول) دوروا على بدائل للحليب...
طبعا أنا مش بحرم نعمة ربنا و مش بقول نقاطع الحليب
لكن لو كنتوا زى حاﻻتى كباية الشاي بحليب الصبح او طبق رقائق الفطور ( فطارى المفضل) بيخليكوا نعسانين و معدومين الطاقة باقى اليوم فأنصحكم بتجربة حليب اللوز
اللوز غنى بالكالسيوم و الكثير من المعادن و الفيتامينات و خصوصا ﻷننا بنستخدمه نىء...
طعم الحليب نفسه فى اﻷخر قريب جدا من طعم الحليب( وخصوصا اذا كنت حتستخدميه للنسكافيه أو رقائق الفطور أو زى الصورة مع الشوفان)...مع "تاتش" مكسرات لطيف كدة...
مع طبعا كمية دهون قليلة قويييييييي
هو بيتباع فى السوق جاهز... بالشىء الفلانى...وبالصويا...
لكن عمايله فى البيت سهلة قوييييييي
زى ما حتشوفه فى الفيدو المرفق بآخر المقالة
مقاديره
١ كوب لوز نىء بقشره
٤ اكواب ماء
رشة فانيلا
رشة ملح
تمرتين ( او ثلاثة حسب الرغبة)
الفيديو هيعرض طريقتين لعمل حليب اللوز انا شخصيا بحب الطريقة اﻷولى واللوز المطحون المتبقى بحمصه فى الفرن وبرشه على طبق الشوفان أو الرقائق ( طعمه تحفة) بينما مامتى ( الله يديها الصحة و العافية) بتحبه نىء أكتر من غير تحميص.
والطريقة:
١. بننقع كوب اللوز فى شوية ماية يدوبك يغطوه لمدة ليلة واحدة
٢. بنصفيه من الماية و نحطه فى الخلاط مع باقى المكونات ونضربه
٣. نصفيه و نحطه فى التلاجة
بس كدة :)
جربوه و قولولى رأيكم
و ادى الفيديو
No comments:
Post a Comment