قصة اليوم...أو نصيحة اليوم الحقيقة مليش فضل فيها...وياريت دعواتكوا تخص اﻷم الرائعة اللّى بعتيتهالى عشان أنشرهلها هنا
والحقيقة هى طلبت منى أعيد صياغة الكلام بأسلوبى...
لكن أسلوبها من وجهة نظرى أحلى من أسلوبى بكتير فمقدرتش أحط فيها قلم وقررت اقدمهالكوا زى ما هى ويارب تفيد المهمهات اللى بيمروا بنفس الظروف مع اطفالهم
واليكم القصة...
" تجربتى انهاردة شديدة الخصوصية ﻷنها تخص بنوتى وﻷنها كانت مسببالى قلق
ولما اتحلت ارتحت قوى...
بنوتى عندها ٤ سنين...من حوالى سنة ﻻحظت انها بتنام على مخدة على اﻷرض
علي بطنها و لما أنادى عليها تقوم بسرعة وكأنها عاملة حاجة غلط.تابعتها
وفهمت انها بتعمل كدة أما تحس بالملل مثلا واكيد لاحظت ان الحركة دى بتديها
شعور لطيف و عشان كدة بتكررها تانى
اول حاجة حاولت لما تعمل كدة مزعلقهاش وﻻ احسسها انى أخدت بالى أصلا بس
أخدها فى حضنى وأفضل أزغزها ونضحك وكدة...
وﻷن بنتى بتحب الزغزة والهزار الجسدي...قريت عن نوعية اﻷطفال دول وفهمت
انهم بيحبوا الحركة وذكائهم غالبا بيكون ذكاء حركي ( يعنى عندهم قابلية للتفوق
فى اﻷنشطة الحركية) ويناسبهم الرياضات العنيفة و الرقص اﻻيقاعى وﻷنى طبعا
مش عاوزة بنوتى تلعب رياضات عنيفة قررت اشتركلها فى نشاط ايقاعى...
ولقيت فعلا نادي بيقدم للبنات الصغيرين نشاط زومبا ومقدمات باليه
اشتركتلها وﻻتتخيلوا سعادتها بالزومبا وبقيت اى موسيقى تألف عليها حركات
زومبا...
ونزلتلها فيديوهات زومبا على الكمبيوتر وبقيت لما تزهق تفتح الزومبا وهات
يارقص...
المشكلة راحت فييييين؟
انا مش فكراها اصلا....انتهت من جذورها"
شفته اسلوبها حلو ازاى؟
الحقيقة انا أكتر حاجة عجبتنى شخصيا فى القصة ان اﻷم بتقرا و بتثقف نفسها تربويا
بدليل انها سمعت عن انواع الذكائات المتعددة
ربنا يباركلها و يجزيها خير على النصيحة المهمة دى
اﻻضافة الوحيدة اللى ممكن اضيفها هنا ان القصة دى بتنبهنا ﻷهمية وجود نشاط حركى
فى حياة وﻻدنا...وان اﻻهتمام بأنهم يلعبوا رياضة حتى لو فى البيت شىء مهم ﻻزم نفكر
فيه
اذا كان عندك تجربة تحبي تنشريها هنا ابعاتيهالى على بريد الموقع
omoumatu3ya@gmail.com
او عن طريق صفحتنا على الفايسبوك
www.facebook.com/smartmommys
استمتعى بأسرتك الجميلة :)
No comments:
Post a Comment