قصة اليوم عن أم مميزة جدا...دكتورة ريهام عباس دكتورة مصرية مقيمة فى السعودية وأم ﻷربع أطفال ما شاء الله...باﻻضافة الى عملها كطبيبة فهى دلوقتى بتحضر الماجيستير -ادعولها جميعا يا ماميهاتى الحبيبات- ربنا يقويها و ييسرلها أمورها و يكمّلها على خير ان شاء الله...
باقى التفاصيل و اﻷسئلة بقة حترد عليها دكتورة ريهام بنفسها
١. ياريت نبتدي بانك تدينا نبذة عنك
ريهام ٣٤ سنة. خريجة طب القصر العينى دفعة ٢٠٠٣. اتجوزت ٢٠٠٦ وعايشين فى السعودية من أول ما اتجوزنا تقريبا.
اوﻻدي هما فيروز ( ٧ سنين و نصف) عمر ( ٦ سنين) و تؤامي الصغننين فريدة و عبد الرحمن (سنة وشهر).
احنا مقيمين فى الرياض و زوجى طبيب جلدية وأنا حليا بدرس ماجستير طب أسرة.
٢. كأم عاملة اكيد بتواجهى تحديات للتوفيق بين بيتك وشغلك بتتعاملى معاها ازاي؟
طبعا التوفيق بين البيت و اﻻسرة شىء صعب...وبيحتاج مجهود لترتيب الحياة...
فى البداية اضطريت أقعد فى البيت اما ولدت بنتى ﻷنى كنت محتاجة اتعلم اتعامل مع طفلة لودحى ﻷنى كنت لسة جديدة فى البلد معرفش حد وماليش ﻻ اقارب وﻻ معارف حواليا...
بعد ما نزلت الشغل بقيت باخد اوقات شغل عكس زوجى عشان حد فينا يكون مع البنت بعد كدة ربنا رزقنا بطفلنا الثانى فقررت اآجل اﻻنجاب شوية بعده...
عشان تكون اوضاعنا فى البيت مستقرة اشركت زوجى معايا من اﻷول فى المسؤليات
بس طبعا زى حال كل الرجالة بيبقى فيه تكبير دملغ كتير وده لخبط الدنيا لما عرفت انى حامل فى تؤام و فى نفس الوقت تتاح ليا فرصة الماجيستير (on line) فبدأت ادور على شغالة بس للأسف مشيت بعد شهر وبدأت أدور على جليسة أطفال وأخيرا لقيت...وحاليا والدتى عندي و بتساعدنى مع اﻻوﻻد (ربنا يباركلها ويديها الصحة)...حاليا ماما رجعت مصر و بدور تانى على جليسة...ادعولى
٣.من تجربتك تنصحى أى أم جديدة تعمل ايه؟
نصيحتى ﻷى أم جديدة انها تشرك زوجها معها فى المسؤليات من البداية حتى لو مش بتشتغلى وحاولى متشيليش فوق طاقتك و تحاولى تخلى حياتك منظمة قدر المستطاع...
( تعليقى الشخصي على النصيحة دى ان فيه مهمات ينفع زوجك يعملها فعلا كل زوج حسب اللى يقدر يعمله وبالنسبة لمتحمليش نفسك اكتر من طاقتها بانك مش ﻻزم تتطبخى كل يوم خاروف محشى وبيتك يبقى شبة الكاتلوجات وخابزة العيش بنفسك و عاملة حلو بيتى كل يوم و كمان عاملة شعرك عند الكوافير وﻻبسة فستان سهرة...قسمى اهدافك ايه مهم ماينفعش مايتعملش وايه ممكن يتآجل أو مش ضرورى يتعمل اساسا...ايه اهم فمهم فأقل أهمية بشكل واقعى قابل للتنفيذ مش خيالى ) وحطى جدول ليومك ...النظام اساس كل حاجة...واستعينى بالله وادعيه انه يباركلك فى وقتك
٤.وتنصحى أى أم بتفكر فى انجاب أكثر من طفلين وحابة فى نفس الوقت متخسرش وظيفتها تعمل ايه؟
والله انا مكنتش اتخيل فى يوم من اﻷيام انى حأكون أم ﻷربع أطفال بس بعد ما وﻻدى الكبار كبروا شوية حسيت انهم قليلين و لما فكرت اجيبلهم طفل كمان ربنا رزقنى بتؤام الحمد لله...
نصيحتى باعدى بين اﻷطفال فى الحمل عشان يقدر الكبار يساعدوكي شوية
٥. أى وضع فى الدنيا له عيوب و ممزات ايه مميزات الغربة من وجهة نظرك؟
قد ايه الواحد بيحس بقيمة بلده أما يكون بعيد عنها...مهما حقق الواحد من نجاح مادى بيفضل حاسس نفسه برة بلده غريب
٦. ايه أكثر تحديات بتواجهك فى حياتك بشكلها الحالى؟
اكثر حاجة بتتحدانى و بأتحاداها الفشل...بتحدى انى يتقال عنى أم فاشلة فببذل كل جهدى عشان احسن سلوك وﻻدى وبتحدى ان يتقال عنى دكتورة فاشلة فبذاكر عشان انجح و اتطور كدكتورة وبتحدى ان يتقال عليا زوجة فاشلة فالحمد لله بهتم بمظهرى فى البيت ووزنى باستمرار
آه نسيت اقولكم انى نجحت الحمد لله نجحت فى اول امتحان ادعولى فى الباقى بقة ان شاء الله
وأخيرا دكتورة ريهام كتر خيرها عرضت انها تقدم استشارتها و مساعدتها ﻷى أم فى
اى استشارة طبية أو تربوية على ايميليها
rehamabas80@gmail.com
اذا كنت شايفة نفسك أم مميزة و تحبى أنشر قصتك أو تعرفى ام مميزة تحبى انشر قصتها راسيلينى على ايميل الموقع
omoumatu3ya@gmail.com
او عن طريق صفحتنا على الفايسبوك
www.facebook.com/smartmommys
No comments:
Post a Comment